مبدعو مصر
تنويحه ولو حيموت : علي نوح
مدام ضلك فِ يوم عدى على دربي
وباع أملي على استحياء
ما يلزمنيش حنان الأرض في وجودك
أنا آسف
ما نيش ح ارضى أكون راهب
وديرك بالذنوب مبلي
ورنامك
بتاكل صوته أنشودة
ناسيها اللحن من بدري
باشوف ليلك
طريق واصل لآخر درب في السكة
ونجمك طافي أنواره
ف ليه أحلم بحضن الفجر م المغرب؟
واجري فوق شطوط الضِّي
أستقضى خميرة ننور
يجوز تنفع
ف ليلة ضلام راح اتنازل
على قلبي اللي حبك غصب
وارْكْب قلب مفتاحه ما بيصديش من الفُرقة
يصُب المسك ف عروقي
ف اتنفس ببلونة نافخها الشوق
ف ساعة حظ تنشيني
تخدني ل فوق
تعِيشني حلاوة الحب ف بعادك
فحاسترضى
وبالموجود من القسمة
واخنق كل ورداية
هاديتهالك ف ليلة أُنسْ
حاتجلى
وأبني الجنة جوِّايَّا
وأحوطها
بسور عالي من الأشواق
ومش ح اسمح لعصفورك
يشارك قلبي دقاته
ولو حيموت…
ــــــــــــــــــــــــــــــــــ
من ديوان / طقاطيق منوحاتي
أبو الأنواح
قد يهمك أيضا