قصيدة بالعامية جديدة لشاعر البحر السيد عبد الفتاح

تشرف مجلة مبدعو مصر الادبية ان تنشر هذا النص علي صفحاتها لتزين به جنبات واركان وصفحات وبساتين ازهار المجلة لما للنص من حلاوة وطزاجة بطزاجة قلب شاعر البحر ابن مدينة بورسعيد الباسلة المحبوب الشاعر الكبير السيد عبد الفتاح .

أنا عشت حياتي مبرمج روحي على الأزمات

ومخلف حتى عيال مالهموش طموح

أنا ساكن فيا حاجات شبة اتهامات

بس المشكلة ان انا مش قادر بيها أبوح

ومعشم لسة الغنا جوايا يغني سكات

والسكنة بتاعتي يإما الأرضي ،

يإما سطوح !

أنا زي الديك فى آدان الفجر

يدن يدن .. ولا يركعهاش

أنا كمبيالات على وصل أمانة ..

أنا كلي اقساط وماليش ف الكاش

أنا حلم ومات واقف مصلوب

لكن .. ما بكاش ،

أنا حبة طوب ..

فوق بعضيهم

بانين تربة ..

والتربي ماجاش

أنا قطر بضاعة بيتحمل بإيدين أوباش

دانا لسة الفرحة اللي حالمها ..

راكبة القشاش

من صغري انا عايش

فى حارتنا

جوة الإنعاش

أنا طير مش لاقي خلاص عشة

أنا زرع وجزار بيحشة

أنا نص حياتي عايشها طابور

واما اوصل ..

الحظ يهشة

أنا قلب اتوضى لبن مغشوش

أنا شط لبحر .. ملان فنكوش

أنا ضمن عيون ماشية تبحلق ..

مالهومش رموش !

أنا ليل مستغرب م الضلمة

مش لاقي نهار

دانا كل ما اقول بكرة هاتفرج

يرفسني حمار

طب اقولك حاجة من الآخر

أنا حاسس عمري بيتاخر ..

فلعبت قمار

***

قد يهمك أيضا