مبدعو مصر
لساك حزين
لساك في غزة ودير ياسين
نازل في دمع السهرانين
ساكن اهات المجروحين
قاعد على كوم الجراح
بتبص العمر إلى راح
وشايل هموم القبلتين
لساك حزين
لساك على جسر الالم
بتدارى بغناك الوجع
ضارب جدورك في الحجر
مش راضي ابدا تتخلع
لساك مش قادر تقوم
لساك رافض يوم تقع
لساك في أنفاس الكبار
لساك في رضعات الصغار
بتودع الطير المسافر
تحضن الطير اللى راجع
لساك بتداوى الجروح
وأنت نايم ع المواجع
لساك بتمسح في دموع لبنان
ساند بايدك ع الجولان
لساك في كل مكان
مدنة وهلال
حق وخيال
لساك ادان
انا شفت فيك العجب
شفت عمرى
وشفت موتى
دفعت فيك تمن الكلام
ودفعت برضه تمن سكوتى
لساك بتعمل من طين الفرات منديل
يمسح الدمعة إلى سالت
من عيون النيل
لساك دليل
لساك
على جريد النخيل
بتضحك الزرع في كف الغيطان
ورافض ويا الريح تميل
لساك مصمم تبقى فرحة كل جيل
وعاشق طريق المستحيل
لساك وطن
قد يهمك أيضا