موسوعة شعراء العاميه بمصر / الشاعر : عمرو المصرى

عمرو المصري
ــ محاضر مركزي بهيئة قصور الثقافة
ــ عضو نادي أدب روض الفرج

الجوائز الرسمية
1ـ جائزة النشر الاقليمي عن ديوان ( نقطة تفتيش ) عام 2010
2ـ جائزة دار الادباء عن قصيدة ( نقطة تفتيش ) عام 2011
3ـ جائزة الجمهورية في شعر العامي عن ديوان ( غرفة انعاش ) 2011
4ـ جائزة النشر الاقليمي عن ديوان ( فحت البحر ) عام 2016

الاصدارات
1ـ ديوان اشعار متحررة 1992
2ـ ديوان نبع العشاق 1995
3ـ ديوان عشقنا الحب 1997
4ـ ديوان في عز الليل 2000
5ـ ديوان لحظة لقا 2003
6ـ ديوان قصر النيل 2007
7ـ ديوان نقطة تفتيش 2010 الهيئة العامة لقصور الثقافة
8ـ ديوان غرفة انعاش 2015 الهيئة العامة للكتاب
9ـ ديوان فحت البحر 1016 الهيئة العامة لقصور الثقافة
10ــ له تحت الطبع ديوان ( كيد النسا ) مربعات ( سباعيات المصري )

ــ تم عمل دراسة نقدية عن ديوانه ( نقطة تفتيش) في مؤتمر ادباء مصر وطبعها في كتاب الابحاث عام 2011 بالجيزة
ــ تم عمل دراسة نقدية عن ديوانه (فحت البحر ) في المؤتمر الاقليمي 2017 د/ حسام عقل
ــ ترجم له بعض اعماله من هيئة قصور الثقافة الى الانجليزية
ــ مارس كتابة فن السباعيات ــ المربعات ــ المتلوت
ــ له الكثير من الحفلات الخاصة

ــ الاعمال الغنائية
ــ اوبريت الليلة المحمدية ــ المحروسة ــ ولاد الحارة ــ
ــ الاغنية المترجمة ( بحبك يا رسول الله )
//////////////////////////////////////////////////////////////////////////////////////////
قصيدة / ابن عــــز
ــــــــــــــــــــــــــــــــــ
نِزّ الوجع من بين جنابك نِزّ
قلبك يا متحمل على عكاز
بطنك ازاز شفاف لأسرارك
والدنيا شادة الحيل على الآخر
بالتالي ؛ ممكن تقسمك وتقسّمك
وانت اللي واقف عنتري
ممدود على طرف الحياة
كل البيبان متقفلة
بالضبة والمفتاح
ومالكش سكة للنجاه
أندغ ف أيامك عشان تخلص
واجْترّ من صبر السنين على قد ما تقدر
قزقز ف أحلامك ومز
انت اللي من دون العباد..
بتمد عودك للسما
باصص لفوق
راضع حليب الشمس ضي
راضي تكون عَبَّاد
والشمس لو زعلت ف يوم ..
قلبك مايستطعمش شئ تاني
زهرك مابيفتّحش
صدقني لو حباَّك أكيد يبقى على علة
والعلة كان مالك
بكره يروح المال وتفضل ..
انت زي ما انت على حالك
كل اللي ممكن تملكه..
قلبك , على شوية كرامة اتكونوا
من كل قصة حبتين
ريحة الجراح ..
وحشه
ومابتنطاقش
” والصبر مفتاح الفرج ”
ولكنه مابيفْتحش
طعم الحياة مالح
والعيشة مش بتلذ
كل اللي قادر تعمله ..
واقف على سنانك تجز
يا مستفز ..
طلع إيديك م الشق
وانفض غبار العشق من روحك
دا مراكب الأحلام غارزة في لحم اليأس
صعب انها تتزق
قوم امتطي ضهر الكلام
فُك اللجام من حلقك الناشف
إحساسك الكاشف لشيء مجهول ..
منقول بكربونة أكيد من دفتر الأحوال
آاااه يا جدع ..
مجروح بتتنفس وجع
أصرخ وقول
إيه راح يفيدك م السكات
لو كنت مابتنطقش ؟
دا العشق زي النخل ف العالي
والنخل ما ينولش طرحه ..
إلا لما الريح تهز
يا عم فـز
صبرك على المقسوم
ما بين قلبك وبين ..
محبوبتك الشمس اللي ع السكة
وبتاعة الناس كلها
روح قول لها ..
طلع النهار أعمى
ومابيسمعش
والليل كما العادة عينيه حمرا
والكل بيحب القمر
بس القمر بيحب مين
ماتصدقوش لو قال ف يوم إنه معاك
الخطوه بالخطوه تلاقيه دايما هنا وهناك
مابقاش يليق دور الوزير تاني عليك
وعساكر الشطرنج مابتكبرش
إلا على استحياء
مش كل قلب غريق..
بيتعلق ف قشاية
علشان يعيش
وانت اللي ف العشق اغتنيت
كنت ابن عزّ
دلوقت قلبك ف الهوى طمعان
يبني له بيت
إيه ياخد الريح م البلاط ..
غير رميته ع الأرض ؟!
واخبط دماغك ف الحيطان
مين اللي بيحس انكسار النخل لما بينحني
لو ماارتواش ؟
أفتح قوسين واكتب…
لن يلدغ العاشق من العشق المزيف / مرتين
وانت اللي بتشوف الحقيقة مرتين
والتالتة محسوسة
ليه كل ماتشوف الطريق
واضح إليك .. بتشذ
خليك كدا
نز الوجع من بين جنابك نز
كل اللي قادر تعمله
واقف على سنانك تجز .