مبدعو مصر
الواد العسّول !!
***************
أول امبارح وانا جاى من قنا ، ركبت العربية فى الكرسى الورانى ، وفجأة بصيت قدامى لقيت واحد صاحبى ماشفتهوش من زمان قوى ، وجنبه واحدة لا بسة عباية سودا وشايلة عيل ، فسلمت على صاحبى بحرارة ، وسألنى عن الأحوال ، وايه ياعامل يا استاذ عادل ، وانا سألته : ايه الأخبار يامحمد .. فينك ياصاحبى من زمان ماشفتك؟ قاللى : المعايش والله ياصاحبى، خدتنا الغربة يااستاذ عادل ، وبعدت الناس عن بعضيها ، وتبادلنا حديث المودة عن الزمن الجميل الذى مضى ، وبعدين قعد يلاعب فى الواد اللى ملطوع فى صدر امه ، ويظغظغه والواد يفط ويقطع من الضحك ، ومحمد يعمل للواد بخشمه الواسع ويقوله: اممممممممم مه !! اممممممممم مه!! وأمه تبتسم فى خجل وتبص لتحت ، وكملت العربية بالركاب واتحرك السواق وبدأت الناس تطلّع الأجرة ، قمت انا مطلع عشرة جنيه ونص وبعتّها للسواق قدام وقلتله تلاتة يااسطى ، وبصيت لصاحبى اللى قدامى وقلتله : خلاص ياحج محمد الأجرة واصلة انت والمدام ، فشكرنى الراجل وضحك وهمس لى وقال : طاب ليه دفعت تلاتة ؟! قلتله : انت والمدام وانا !! فابتسم وقال : بس المدام مش تبعى .. انا مااعرفهاش والله !! استغربت وقلت : ماتعرفهاش كيف ومن الصبح تلاعب فى الواد وتظغظغ فيه يامحمد ؟!! وضحك وقال : لا والله مااعرفها بس لقيت الواد عسّول، دمه خفيف زى العسل وقعدت الاعبه !! ضحكت وقلت : حصل خير .. وعلى العموم انا برضه دفعت لاختى .. وبصيت ليها وقلت : خلاص يامدام الأجرة واصلة ، فبصت لورا باستغراب وابتسامة وقالت : انتو بتتكلموا عليا انا ؟! لا والله يااستاذ عادل كتر خيرك معايا فلوس والله .. قلتلها : انتى تعرفينى؟! ضحكت وقالت طبعا ، فيه حد مايعرفش عادل صابر !!
قلتلها : طاب انتى مين ومنين ؟ قالت : انا فلانة الفلانية اخت فلان الفلانى ، من بيت فلان !! فقلتلها اهلا اهلا بيكى .. انا كدة مادفعتش لحد غريب برضه ، الحكاية فى بيتها ، وايه عاملين ، وايه عامل فلان ؟! قالت بأدب : الحمد لله يا أستاذ عادل والله ، وشكرا على الأجرة !! وطبعا كان نفسى الاعب الواد العسّول بعد كدة واظغظغه بس اتكسفت ولقيتها بايخة ، وقلت الواد حيستحمل كام ، انا ولا محمد !!
المقصود ..فيه حاجات كتيرة بنعتقد انها بسيطة لكن فى الحقيقة هى عيب ولا تجوز فى وسائل المواصلات العامة ، وعلى عتب البيوت وفى الشوارع، على الأقل ، زى اللى حصل من محمد مثلا !!
زى برضه تلاقى واحدة وسط الناس تطلّع بزتها اللى كد ضرّة الجاموسة وتفضل ترضع العيل وسط الناس ، والواد المضروب يفضل يشفط ويمص زى وحش مطلوق من جبله، وصوت المص يملا العربية ، وهى ناسية ان الثدى بالنسبة للناس عيب ، وبالنسبة للجماعة الباردين ليه وظيفة تانى غير رضاعة العيل !!
وتلقى برضه واحدة واحدة تفضل تظب فى عيلها فى العربية وتبوس فيه وتعضعض فى خدوده وسط الناس وصوت البوس يخلى كل اللى فى العربية مستمتع ومش عايز ينزل !!
حاجات كتيرة بتحصل من الناس عن جهل ولكنها عيب وحرام ، فياريت نخلى بالنا من الحاجات دى ، ونحاول نعرِّف الناس بيها حتى ولو على المنابر وفى دروس الدين ، لإنها لاتجوز وبتثير الغرائز حتى لو كانت بحسن نية ، وبلاش نفضل نلاعب فى الواد اللى على صدر امه ونضغظغ فيه حتى لو كان عسّول !!
قد يهمك أيضا