مبدعو مصر
قطر الليل . شعر : محمو د وحيد
يا قطر الليل
وطالع تجرى
فوق قلوب الناس
غشيم الخطوة مش فاهم
عديم النخوة والاحساس
يا قطر جبان
بتحصد فى الأمال
وتهد
كفيف القلب
وكفك فاس
على جبينك شتايل
موت
وبذرة شر ف كفوفك
وصوت مكبوت
وصفارتك نذير
أحزان
تسكت ضحكة العاشق
وتشعل ف القلوب
بركان
كراسى الهم
مضمونك
وفارد ع المدى
لونك
يا قطر خسيس
وطول عمرك
ف طبعك دون
مفيش عاقل
ولا مجنون
يأمن قلب خان دقه
ويتعشم يلاقى أمان
جنوحك ع الطريق
مقصود
لا هو صدفة ولا تقصير
لكن النية دوس الخلق
وكل اللى يقولك لأ
ساعة ما تحسها تاكله
ويبقى الموت
ساعتها مصير
يا قطر الدمع والأوجاع
وليك أتباع
يرشوا الضلمة
فوق الحيط
يشدوا الخيط
على رقاب اللى
عاشوا جياع
يا موت متباع
لعشاق الحياه والجاه
شكيتك يا قطر لله
قلوب الخلق مش
طايقاك
ولا يمكن اليك تنصاع
يا قطر الليل
كفاية اللى ف حضــــنك
راح
كفاية جراح
نهار الحلم مستنى
بقاله سنين
ومن حقه ف يوم
يرتاح
ففارق سكة
المساكين
وسيبنا نكمل المشوار
ماهواش تـــــــــــــار
ولا ينفع ما بينا حوار
ما عادش العمر يتحمل
ملام وعتاب
يا قطر الليل
كفاية عذاب
شعاع الشمس لابد يفوت
ويفتح للى جاى أبـــواب
فلم الباقى من توبــك
بلاش تلزمنا مكتوبك
ما عادش ف عمرنا باقى
ولا ينفع ما بينا حساب
*الشاعر_ عضو نادى الادب بمدينة مغاغة بالمنيا
قد يهمك أيضا