مبدعو مصر
الشاعر والناقد والباحث الكبير الدكتور مسعود شومان .. الرئيس السابق للهيئة العامة لقصور الثقافة . ورئيس تحرير مجلة الثقافة الجديدة .. شاعر من شعراء العامية الكبار .. صدر له مجموعة كبيرة من دواوين الشعر العامى .. وله باع طويل فى مجال النقد الادبى ، نقدم لقراء ” مبدعو مصر ” احد نصوص هذا الشاعر التى تتمتع بالصور المكثفة والمفردات الاصيلة والسلسة ونعدكم اننا دوما نتحفكم بقصائد لكبار شعراء مصر بين الحين والاخر والان نترككم مع رائعة شومان.
أنا القتيل اللى فارق عش الحبايب . شعر : مسعود شومان
صباح الخير
ياقطط يا كلاب
يا كف إيد ع الباب
بتنقط المزيكا نقطه بنقطه
أجمل صباح على هدومها القطيفه
ع الدلايات اللى ساقطه
وبتلاغى الندى فوق التراب
قالت بحبك والجناين باحت
والضحكه ساحت فى شفشق العناب
ومين على السكر ها يقدر
أول كلامها قطمة الجلاب
الاسم فاطمه والشفايف قله
وعيونها تشرح حزنها بعتاب
يعنى انت مين دلوقتى يا ابن الضله
ابن الجروح على شجرة اللبلاب
ابن الشقوق اللى وسعت
وخالى نخل الخلا اللى اشتهاه الغراب
واختى الحكايه اللى دبلت
وبقت حجاره ومفارق
أنا اللى القتيل اللى فارق عش الحبايب وغاب
من غير كفن أو وداع
من غير عيونك يطلوا
والنخل بيعادى ضله وبيشتريه الخراب
عنقودى عفن فى حضنك
وضلوعى تشبك فى غصنك
وَيَا شكاير البلاستيك
حاولت أرفرف كأنى
ريشه فى غيامة السحاب
وبدأت من تانى أغنى
وحدانى وسط الطيور
يسمع كلامى الجبل
والحصو والفراشات
والحنضل المجعوص وَيَا الهالوك والسبل
بيكمل الحكايات
وانا والجروح اخوات
والأرض بقعة دم
وسط الجماجم بنقرا
نقره تسلم لنقره
وطير يودع فى طير
الليل يروح ويرجع
اسم القتيل اللى ودع
اختار يكون جناحين
فى دنية العصافير
مستنى منقاره يطلع
ويقول صباح الخير .
قد يهمك أيضا