مبدعو مصر
استقبال رمضان
ليــــلـــــة الــــــــــرؤيـــــــــــة (1)
يا لمة العشاق على الطبليه محلاكم
……………………………………….
قال الهلال بالدلال أنا قمر ونّاس
قلبى ملان بالنور والسما بيتى
فرحان كأنى وليد وبيستقبلونى الناس
بالود والائتناس يا مصر حبِّيتى
والليله بان الهلال ومونساه نجمه
وام العيال فرحانه بقدومه
صحيوا الولاد فى منتهى الهمه
خبط بنوره ع البيبان وقال لهم قوموا
اتجمعوا على السحور وكِمْلت اللمه
واللى غرق فى النوم قام دُغرى من نُومُه
دا نور جديد بالصفا طالع على الأمه
يا لمة العشاق على الطبليه
جانا آوان النور من بكره هاتصوموا
صوموا تَصِحّوُا جاى معايا النور
صوموا عن التضليل .. عن الكلام الزور
عن كل فعل قبيح .. عن النفوس البور
لموا الأيادى بالمحبه واجبروا المكسور
واجمعوا الخير م الغيطان واحفروا التقوى
على كل دار خلوا المحبه تدور
رمضان فى إيده السبحه ومعدِّى
على كل بيت يقرا آيات الحمد والأذكار
و فى كل حاره بيمشى ويهدِّى
وفى كل ليل يملا قلوبنا نهار
يا لمة العشاق على الطبليه محلاكم
أنا من سنين يا ولاد مستنى لمتكم
نظرة رضا وآمان بتهل فى دُعاكم
والجمع راسم نور مبدور على بيتكم
شوفت السما ساعة الآدان سمعاكم
الليله بان الهلال ومونساه نجمه
وام العيال فرحانه بقدومه
صحيوا الولاد فى منتهى الهمه
خبط بنوره ع البيبان وقال لهم قوموا
اتجمعوا على السحور وكِملت اللمه
واللى غرق فى النوم قام دُغرى من نُومُه
دا نور جديد بالصفا طالع على الأمه
آدى البشاير بتطرح ع الشجر أنوار
والخير على الصايمين فى الغيط وفى الشارع
والقلب هايم وصايم ومَركِبُه الأذكار
نوره بيضوى بالحنان على مدنة الجامع
ووراه يصلى الورد ليل ونهار
يا لمة الأحباب على الطبليه ساعة السحور
يا لمة الصحبه على نور النبى المختار
محلاك يا صوت رفعت عشيق النور
واللقمه تسرى بالهنا ساعة الفطار
الليله بان الهلال ومونساه نجمه
وام العيال فرحانه بقدومه
صحيوا الولاد فى منتهى الهمه
خبط بنوره ع البيبان وقال لهم قوموا
اتجمعوا على السحور وكِملت اللمه
واللى غرق فى النوم قام دُغرى من نُومُه
دا نور جديد بالصفا طالع على الأمه .
