مبدعو مصر
الاسم وائل السيد
مواليد 4يناير1984
شاعر عامية من المنيا صعيد مصر،قمت بتأليف استعراضات مسرحية بدرية اتخطفت مع الفنانة بدرية طلبة والأستاذ مصطفى سالم.
وأول المنيا سنتين متتالين
في مسابقة المنيا شعب واعد 2017و2018 وفي نفس السنة مركز تاني الجمهورية في مسابقة إبداع مراكز الشباب على مسرح الوزارة فى نسختها الأولى
حضرت العديد من الأمسيات في مختلف محافظات مصر.
نشرت لي قصيدة جوز عصافير في جريدة الجمهورية 2017.
وفي جريدة الأهرام 2020
وفي العروبة2023,2024
وفي أفريكانو الثقافة 2024
وأخيرا قصيدة أراجوز في الأهرام 2024
تم تكريمي في عدة محافل أدبية أهمهم ساقية القاضي الثقافية لصاحبها ومؤسسها الحاج محمد القاضي .
المنسق العام لمنحة مسافات تحت رعاية مركز نوافذ لتنمية المهارات.
الأمين المساعد للشؤون الثقافية في حزب حماة الوطن .
صدر لي ديوان كعبة مهجورة عن دار نشر المثقف 2022
فائز في النشر الإقليمي 2024 وديوان نويت أبطل صلا.
من اشعار الشاعر
أنا كل المؤمنين
………….
ونزلنا م الجنه
كان اللُقا عرفات
قلبك رفع صلوات
على قلبي فاتوضا
نزلت دموعي سيول
ع الخد من فضه
فاتفضى من جلدي
آخر بكا التفاصيل
شفتك نهار أبيض
غنوكي ف المواويل
ضحك المحيط أعلى
من ضحكة الهذيان
ضحكك كما بستان
وانا قلبي كان متصاب
بالجرح والعِلّه
مُحتله أيامي كل جيوش كِسرى
الكسره بانيه البيت
ف قلوبنا من بدري
لفيت بلاد الشوق
بين الغيوم بجري
فتاخدني لحظه طيش
واتمشى ع الموجه
فِرح المكان بينا
قام كاتم الهوجه
تِعبت عيوني سكات
حنّيتها بالطبطه
وحدِك سكنتي وريد
يا هديه يوم العيد
قربك ده كان لي هبه
يا مالكه للموهبه
إنك تشدّيني
تلاقيني في الكتابات
تسقيني خمر حنين
قلبي يفوق م الموت
ويرد ليكي آمين
طول السنين داير
ع الأرصفه محتار
كان حلمي ضمة دار
و انتي سكنتيني
انا خدت راحه ساعات
و شربت من زمزم
الوقت كان مُلزم
إنه يِجمّعنا
كتب التاريخ عنوان
بقى له خلاص معنى
ريحتك في عطر باريس
و معطره وجدي
صالحت أنا بختي
إني أكون لك كون
وإن انطرد من نار
وجهنم المحزون
اسرح بكل جنون
واتخبى ف خدودك
ما تمنعيش جُودك
اسقيني منه حنين
أنا كفي فتح الباب
فا ستخدموه أغراب
واحتلوا منه سنين
اتاريكي فارشه سرير
للراحه ف جبينك
كتروا مُريدينك
وأنا عشقي كان دينك
مش أول اللي ابتدا
أنا آخر اللي ابتدا
أنا آخر اللي اهتدى
أنا كل المؤمنين
قد يهمك أيضا
موسوعة ادباء مصر.. الشاعر/ ايمن محمد السيد