موسوعة شعراء العامية المصرية / الشاعر : عبدة الشنهورى

موسوعة شعراء العامية المصرية / الشاعر : عبدة الشنهورى

*****************
طفـلين بيحـبوا عـلي الـريح
قـلبي وقـلب الـلي قـــال بـي
في الصبح جمعوا التفاريحح
ورموا الخريف اللي طال بي

******************
في الحلـم طـاير مـع الطــير
وجناحي أخـضـر مـلايكــي
والمـال حــدايا فـ قــناطـــير
وفـ بَحري غـَّني الـفـلايكـي

————–

سليم أبوشوف

**********
يدُّه علي زناد الشغل
وقلبه علي آخر سِلِّمه فـ عمارة الوقت
وتمللي يمد الطرف
لعيال فـ عينيه…
بيربيهم رجاله لبكره
وتشوفه مسُورق زي السر
بيخيط توبه المفتوق
أويربط نعلـُه بخيط ويفر
” يلا يارجاله ”
الكلمه الدايبة علي لسانه
وكأنه بيبني عمارته
اللي بيحلم بيها
مكان أوضتين الدبش
اللي ساكنهم هوه وخمسة معاه
ورا حي الشيخ هارون
وابوشوف
اللي تراب الدرب رفيقـُه
واللي براح النيا طريقـُه
عمرُه مايحتار
لوحتي الدنيا انقلبت تل غبار
وفليبه الطارح ضِلـَّه
كأنـُّه بتربطه ويا الشغل غراميات
لوكان دكان في مكان صحرا
كان جُوله زباين بالميات
” هي اللقمه تطيب
غير لما يقاسمك فيها حبيب ؟”
لساني باردد قولته المشهورة
وامـَّا الرِّجل تاخدني ليمُّه
باشوفه هناك
واقف جنب ابوعوزَه
مشمّر ساعدُه
أومتحزم لجل يساعده
ويقول في كلام
يشبه لنسيم مقطوف من طلَّة صبح
” الناس أشكال وانا سَلبي هوا
طول مابتنسي أسية أصحابك .. يكتروا أحبابك
واللي قليبه علي حبيبه
يدور كل الدنيا عليه ويجيبه”
ويزيد أبوشوف
” عارفين يااخوان ايه اللي ناقصنا ؟
شوية ود
يد فـ يد
واحد يدي
من غير مابيستني الرد”
وابوشوف
مش دايما بالأفراح قلبه معبيه
وكتير الديا بتلعب بيه
فيدوِّر جوَّه قليبه
عن خيط تفاريح
علي دكة يسند ضهره عليها
فـ وسط الريح
وساعات سقـَّالة الصبر معاه
تختل
فيلاقي الحل
فـ غُربه توفر لقمة عيش
حتي لواتحمل قهر كفيل
حتي لوشبك فجر اليوم
مع آخر ضي فـ سبحة شغل
يهد الحيل
حتي لوالليل
طـَّول فـ حبالـُه
وضي السكة ماأسعفهوش
تلاقيه بيكسر تل احزانه حتت
وبيبني حيطان أحلامه
واهي ماشيه الدنيا فـ كعب ابوشوف
ان داسته سنابل من خيلها
يصبر عـ الشدة ويرخي لها
يمكن من وسط غبار الخيل
يطلع يوم خير
يحدف لابوشوف

صبح ماعاشهوش

**************
شعر : عبده الشنهوري

—————————

ماعاد تش تهـِم

خلاص
ماعاد تش تهـِم
ضهري اتعوَّد
علي نبابيت الهَم
ياناس
أيا شبَه الناس
لما التايه يمشي .. يدور…
ولايلقاكُم
واما الدمع يعبِّي العين
ولايلقـَي كُم
وامـَّا تلاقي الناس
مش ناس
أوصم ٌبـُكم
وامـَّا الكل
يشمِّر إيده
يشد الآه
من حـَلق الكل
واما الفـُل
يروح للي
ماعُمروش بيشِم
يبقي خلاص
ماعادتش تهـِم
يبقي آخد نبابيت
علي ضهري
كيف مايكون
ولااقولش بم

————————–
سيرة ذاتية
الاسم الكامل : عبده حسن محمود أحمد .
اسم الشهرة : عبده حسن الشنهورى .
تاريخ الميلاد : 20/5/1960 م .
محل الميلاد : قرية شنهور ـ مركز قوص ـ محافظة قنا
المؤهــل : ليسانس آداب وتربية ـ لغة إنجليزية
العمـــل : موجه بالتربية والتعليم “محافظة أسوان”
ت محمول : 01127727146
عضو عامل بنادي الأدب بأسوان _ عضو اتحاد كتاب مصر.
نشرت أعماله الشعرية والنقدية في معظم الدوريات الأدبية المصرية والعربية .
• كما أذيعت قصائده في الإذاعة والتلفزيون .
• فاز بالعديد من الجوائز على مستوى الجمهورية.
• فاز بالمركز الأول في شعر الفصحى في مسابقة إقليم وسط وجنوب الصعيد عام 2001 .
• شارك فى العديد من المؤتمرات الأدبية.

• صدر له: “ديوان ألحان ظليلة” (شعر فصحي)
• ديوان “النهر يطهر مجراه” (شعر فصحي)
• ديوان “أول كلامي” (شعر عامي)
• ديوان “غني الفلايكي” (شعر عامي)
• رئيس نادي الأدب بقوص لعدة سنوات.