مبدعو مصر
قصيدة
همسات رقيقة
شعر / فتحي زيادة
الجمعة 13/1/2023
…………………………….
كل اللي فاكره منها
همسات رقيقة زيها
و خدود بيفوح منها العبير
و رموش حرير
تحضن شعوري تغرّقه
والكبرياء اللي ف عنيها بعشقه
و بصدقه
لأني عارف سمْتها
زي الملايكة ف طبعها
و نسيم بيرسم خصرها
إللي بيشبه
غصن بان
مليان حنان
يارتني نقطه ف بحرها
كل إللي عشته ف قربها
جنه بيزوّقها الربيع
احساس بديع
عصافير بتعزف
سينفونيه
ف حبها
حضورها كان هو الحياه
هو نعيمي و منتهاه
بس الأساس
عصفوري راح مني خلاص
حلمي رسمته بالرصاص
ورجعت تاني لوحدتي
وللزمان اللي بيفرق لمتي
يا رتني عايش جنبها
يا رتني ورده ف شعرها
يا رتني سطر من روايه تحبها
كل إللي فاكره منها
إن الحياة دي كلها
كانت لها
شعر فتحي زيادة
عضو النقابة العامة لاتحاد كتاب مصر
