مبدعو مصر
هيَّه اللي نالت غُنا ودمعة العاشقين
إلى الصديق شاعر الجنوب الحر / محمد عبد القوي حسن
يا غازل الشقشقه من قلبك العمران ضيا حمام البوح
ناسج حنين الروح وملاية الترحاب
يا قلب مغمور أمل دوماً وبيه فيَّاض
لم طاطا يوم لليأس .. ولا انكسر للغيم
دامت عليك الرؤي تهديك نبوءتها
باقي على عُـقدها ما تفرفطه في هباء
مهما تكون المحن غادره ووحشيه
أو داقت الخطوه الميله والقسوه وفزعة الأهوال
هيَّه حبيبة القلب هيَّه التاريخ والناس
هيَّه السنين والأم وروضة الأحلام
هيَّه اللي نالت غُنا العاشقين .. قالوا
ما هيَّه حاضنه الخُطى ومتبته فيهم
أعشق يا ( عبده ) وانا وياك من العاشقين
وان كنت مغرم قوي بالذكر والمولد
فانت إمام الهوى وحضرة الدراويش
وانا بالتمام زيكم في الهوى مداح
عارفك يا صاحبي العمر ما انحنيت لضلام
شايفك قصاد النور في الأمام / قدام
طول عمرنا شايلين م الوجع فدادين
أهون علينا الموت من إنها تركع لحظه لغير الله
افتح كتاب الأمس فيها الكتير أحوال من العسل والمر
هتلاقي فيه الضار واللي ما بيضر
هتلافي فيه السار واللي ما بيسر
هتلاقي فيها العجب ورحلة الحواديت
مشتاقه تحضنا بالحب نحضنها
فاكريين حلاوة اللُقا والراكيه والشاليه
نشرب شايات مغليِّه بالصبر والنعناع
تهون قساوة الشتا بلمة الأحباب
الله يا .. (عبد القوي ) هاديني للذكرى
والحق بيه نعترف ما سابتنا ولا هجرت
سهرانه ليل ونهار وبهمنا سهرت
خلينا دايما لها نهدهد الدمعه
هتفوت علينا ايام م المحن صعبه
ونشد في هدومها .. ماهي أمنا الصابره
وان كنا مش عارفين نمنحها غير كلمه
جِري الزمن بينا والشعر شاب في الراس
ويقوم علينا الحوَّش م الإنس والشياطين
سرقوا كتير منها وحتى كحل العين
سرقوا نجوم قلبها في عز عز الضهر
خلونا بعض الوقت عايشين عتام الاه
عايزينا يا ( عب القوي ) نحني الرؤوس والضهر
لكن محال يا أخي هنسلم الرايه
لسَّه ما بينا الحلم جوَّا العيون طوَّاف
لسَّاها وسطينا .. عروسة القرية
( راكبه على الهودج )
لسَّاها فاتحه العيون للحياه شبابيك
خلينا زي الندى على خدود الورد
خلينا زي الآهات الحلوه ساعة الفرح
نفتح ميدان صدرنا وبروحنا نحميها
خلينا ليها السند وقت المحن فرسان
نقدر نقول ما نخاف وقت الحروب والسلم
نقدر نقول الحق لو كان على نفسنا
وتعيش حبيبة القلب جوَّه حبابي العين
ــــــ
نبيل مصيلحي
19 من مارس 2020
نبيل مصيلحى مرشح لعضوية مجلس ادارة نقابة اتحاد الكتاب
وعبد القوى يرد
واطلع لهم يانبيل
ف عز الضحى
وافرد مساحات التجلى
ف عز الضهر
انش اشعارك وغنى
احى فينا صوت المغنى
وهات الكلام من الاخر
انت ياصاحبى كلامك دهب
وانا من ميلاد المحبة
بكتب كتاب الرضا
على صفو اورادك
فاقبلنى من عشاقك
وارضينى من حكمتك
واهدينى لربيع سكتك
بين شجر فتوحاتك
انت نبيل المصيلحى
صاحب المبدأ
وانت نبيل المصيلحى
للخير دايما بتبدأ
دابت الطرق دوبان من محبتنا
بعشق فيك الانسان
واعشق هوى جنينتنا
فاقبلنى وارضينى
واغسلنى من صدف المحار
وارقينى من لوعة الانصهار
جايلك وبطلب مدد
يابو الكتايب فتوحات
وابو الحبايب روضات
وابو النجايب محطات
بحبك ياصاحبى قوى
وليك فدادين المحبة
تطرح خضار وثمار
وتهادى فرحتها
لموكب الملكات