مبدعو مصر
أنا حُرَّة… شعر : فاطمة المرسي
————–
بعيد عنك …
بَحِس بمعنى حُـرِّيه
وضحكه صافيه تملا الكون
ولو بالدمع مرويَّه
وتبقى مخدتي طُوبه
وأتلحف بليل أمشير
ومش هاندم عليك نوبه
وانا طايره مع العصافير
يجلجل فى الفضا صوتي
أنا حُرَّه…
وراح زمن العبوديه
كرهت حيطانك العاليه وأسوارك
زهقت خلاص من الحراس
ومن قفصك ولو من ماس
وأيام مش معديه
مانيش مخلوقه من ضلعك
ولا دمي بيشبه لك
أنا مخلوقه من ألمي
ومن دمعي..
وكل الماضي والحاضر
نسيج وجعي
مابين كذبك وبين ضعفك
بتتمايل
وروحي فراشه منسيَّه
وقلبي كل يوم بيموت
لكن دايمًا مالوش ديَّه
ورغم الكذب في عيونك
ساعات أنسى
وادافع باندفاع عنك
وأتخيل صفات مش فيك
عشان صورتك
تبان مقبوله لعنَّيا
جبالك لما تتمخض
شهامتها جنونيه
بنات أفكارك الموؤده من صغرك
معانيها طفوليه
ولما تجُود فى عمرك يوم
بكلمة صدق مقصوده..
ماهيش ليَّا !!
…………………..
فاطمة المرسي