مبدعو مصر
وكنت خلاص
ناويت أنساني وأداري
ورا الكتمان
وأكلم روحي تسمعني
تفكرني بهمس زمان
حاولت كتير .. ومقدرتش
لأن نفسي عانديتني
وقالت لي :–
مالكش في الوجود عنوان
تموت الروح .. متسألشي
تشوف مجروح متزعلشي
بتاكل طقة والتانية
وتشرب ع الكافيه فنجان
وتتفرج علي المجروح
وعلي اللي ع الضنا بينوح
ولما عنيك يجييها النوم
تنام مسطول من التوهان
عروستك يا جدع عايقة
وواقفة صامدة كالددبان
ومش محتاجة زغروطة
ولا تهليل
ولو جت ليها ميت موتة
هتحضن في اليمين قرأن
وف إيديها الشمال إنجيل
عروستك خاصمت الكورة
عروستك نايمة مقهورة
يا ثاير وسط مقصورة
علي بلانتي مجاش ف الجون
متزعلش
ماجه ف صدر غندورة
وقطعها لميت مليون
عروستك نفسها تغني
وتجري في الهوا حرة
فكيف .. نرقص .. وبنغني
ولسه البت مش حرة
ويجري إيه ❗
ما قبليها مات الدرة
❗
عروستك بكر مجبورة علي نكاحها
وجبر البكر مش في الدين
خدتها عصابة ملعونة
وكل العرب قالو :- آمين
ولسه جاي بتسألني
عروستك مين :-
عروستك يا بني
دي فلسطين