مبدعو مصر
انا مين أكون ؟ / قصيدة من شعر العامية للشاعر محمد عبد القوي حسن
انا مين أكون ؟
غير حبة النور اللي تتجحرد في نص الليل
تداري العتمة عن سكك الغلابة التعبانين
وتخضر طريقم للعمار والونس؟
وانا مين اكون ؟
غير نبتة لسه صغيرة
بتكبر وبتخضر في صحاري الكون
علشان تهاديكم بنسيم وضل
وتتلموا تحتيها
وتقروا الفاتحة علي روحي
في يوم من الايام .
وانا مين اكون ؟
غير المسافر في رحلة نهايتها جنة ربنا
وبرد وسلام ع الحوض الشريف
بشرب وبروي كل الصحاب
من كف يدي في الفردوس.
وانا اسبح الله العظيم طول الليالي
واسهر اناجي ربنا في الفجر
وادعي للبشر بالطهر والايمان
ياربي اغسل قلوبهم من الصدا
واطليه محبة وبراءة واندهاش
بالنعم والحمد لله العظيم .
اصحوا بقي يابشر وفوقوا ،
قبل النهاية وارجعوا لدرب الاله
ووحدوه واستغفروا
يطعمكوا ويسقيكوا محبته
ومحبته تكفيكوا عن كل المتع
في الدنيا دي المليانة زيف .
وحد دروبك في دروب الاحبة
الهايمين بالذكر والتوحيد
وبنور الصلاة علي الحبيب المصطفي
واطلع لكل الكون صبوح طاهر سموح
ابيض قليبك كما الحليب
في ليلة النور المعتق في فجاري الضي
وصوت تواشيح بيتوزع علي الاورده ،
فيروي كل ارواح البشر بالبلسم المدهون تقي ومرشوش بعطر الجنة
ومتهادي من حب الحبيب المصطفي
صلوا عليه .
صلوا عليه تلقوا الدروب هايمه
ومليانة بنعيم ،
صلوا عليه
تلقوا التسامح كاسي كل الوجوة بالايمان
والصفح والعفو وحب الخير .
صلوا عليه
تلقوا التحيات تنجلي في الليل
وتصبح زي وردة من شجرة
في جنان النعيم
طالعة تصبح ع البشر بالضي .
ماتسبحوا الله العظيم في سركم
وتسبحوا كده في العلن
وتكبروه وتشكروه
وتشوفوا ايه راح يحصل لكم ،
من اندهاش وهيام وحمد ورضا
وشهد النعيم المنجلي
يدخل قلوبكم بالصفا
يرويها شوق لجنة ربنا
وكل الصحاب حوالين نبينا المصطفي
بيسبحوا في حضرته
وبيحمدوا الله ع النعيم اللي هما فيه .
قد يهمك أيضا: رساله إلى الأمه العربية شعر : شوكت البطوش