مبدعو مصر
……..
بتعمل أيه؟
ومين انت؟
وواقف فين؟
وعايز ايه؟
وهل انت
صحيح عايش؟
وعايش ليه؟
وليه رجليك
بتاخد جسمك المنحول
وتغطس بيه
ونازله لتحت ؟
شبعتش مرمطه وتلطيم
شبعتش ضيم
شبعتش فحت
شبعتش ضرب
فوق راسك
بمطرقة الحياه والشوم
شبعتش أكتئاب وهموم
شبعتش لوم
شبعتش برد ورطوبه
من البدروم
شبعش المخ
يبعت للسان إشارات
عشان ينطق
ومن خوفه ومن فزعه
بيعمل نفسه مش سامع
ومش فاهم
وراح ف النوم
أقولك أيه
وأيه فاضل
عشان يثبت
بأنك حى
أو راح تحيا
حتى ف يوم
أعز ماليك
قصاد عينك بيغرق
وانت مش قادر
تحوش عنه
ويصرخ فيك
تمد أديك
لكن عاجز
تقرب خطوتك منه
وأيه هيفيده
من كونك
حاسس قلبك
صفيح والع
وحتى صراخك العالى
صراخ مكتوم
بصوت منبوح
بيزعق
بس مش طالع
فيعمل أيه
غير أنه يموت
بداء عجزك
وكسرة روحك البايشه
وهى بتنفلت منك
وتتقطع
ورابط ضعفك المهزوم
فى ديله بيجرى ويبرطع
بيسحل فيك
ويكحت لحمك الدايب
ببور الأرض وغضبها
فينزف دمك المسلوب
يغرقها ويفرشها
وأخرتها
تموت وانت
بتتفرج على روحك
وقتلتها
وهى العجز فوق منها
واقف مفرود
على الاخر
وحاطط رجله
وبيضغط
بجز الغل
فوق راسها
وأوصالها
وأركانها
ورقبتها .