مبدعو مصر
عاشق ومغنواتي قصيدة بالعامية للشاعرة فاطمة علام
يااسكندريه
بعشق شتاكي
وأنا طفله روحها
بلون سماكي
تلعب و تجري
ضفايرها بحري
وبقلب أخضر
وبنني باكي
بلطيه عايمه
ف الحب هايمة
قايمة ونايمة
حاضنه ف شباكي
مع ضحكه صافيه
ولقمه عافيه
طعميه جبنه
وفول حراتي
وبوش راضي
يقول ياهادي
الورد فتح
والفجر نادي
يغسل قلوب
تعشق رضاكي
ترماي وكارّو
وناس يسرُّوا
ع الرزق يجرو
هايمين معاكي
حمِّية شيشة
شاحن بفيشة
منديل وبيشة
وبدلة كاكي
درويش وأوبرا
ومحطة كبرى
أدبا وشعرا
دايبه ف هواكي
ملاح ومينا
قلعه وسفينه
ع الشط واقف
شرغوش بيغزل
ف نجوم سماكي
يرمي ف شباكه
ويصيد شباكي
أنفوشي بحري
عايش بسحري
والكل عاشق
ولا يوم نساكي
شي لله يامرسي
ف النية نفسي
لو بس ترسي
لاقيد شموعي
في يوم لقاكي
وعشان ولادنا
جرس و مادنه
فيه صوت ينادي
فى نور ضحاكي
الروح تلبي
على طول نداكي
يا اسكندرية
باعشق شتاكي
# فاطمه علام#
