مبدعو مصر
السيرة ذاتية الاسم / علي عبد الرحمن نوح
اسم الشُهرة / علي نوح (شاعر عامية مصري)
مواليد/ 13/2/ 1967
بقرية الحواتكة،مركز منفلوط،محافظة أسيوط
عضو جمعية مبدعى مصر
رئيس نادي الأدب بقصر ثقافة/ مدينة السلام 00سابقا
عضو أمانةّ مؤتمر أدباء مصر 2016/2017
1- ماعادش ينفع لك سند
ــــــــــــــــــ
مســــتني إيه؟!
من حلم نايم فِ العسل
كسلان يصبّح ع الجفون
أو يمشي مرة ب مكحلة
لو حتى كان راح ينطرد
من دمعة حاضت فِ الزفاف
شبطانة فيك الأغنيات
دِ مناها مرَّة تدوق نغم
طعم الوتر ناقص حلاوة الدندنة
من كام سنة
دبِّ الخريف فِ الجدر شرّخ لك العكّاز
وما عادش ينفع لك سند
ومن المحال انك تنخ
وتطاطي جبرًا للظروف
أو تنكسر
و حَـ تركب الموجة التي
عايشة تربي فِ الزبد
يا متقد….ومفتقد حل السؤال
طب قول لي ليه ؟!
بتسد خانة ف أجوبة
مش معيبة
لو تعترف قدام مراية تشبهك
إنك ضعيف
مش حمل نسمة تلفحك
وفـ حر صيف حلم الحياة
دي الشتلة لسَّة منبتة
زهر الليمون فوق الشجر
يا دوب مرعرع في الدجى
لــمْ يرتقِ أن يُعتصر
فـأزاي تحسّ بنشوتك ؟!
وبشهقة الروح اللي دايبة فِ الشبق
واسمها واقف طابور
مستني يصرف حصته
ف حبَّة مغص
فاقرا الحروف
لو خالية من معنى الكلام
إللي يؤكد مبدأك
يكفيك بعزة إنك حاولت
ف يوم تعدي للشروق
بس القانية مربربة
وف سكتك يابسة العيدان
متخشب الشوق فِ الجذور
على بعد ليلة من هنا
سوء المصير حط الرحال
دق الوتد قبل النهاية بخطوتين
بيـوفي ندر مأجله
من يوم ما زقزقت الطيور
وزوقت سور السما
زغاليل وسابت عشها
شايلة الصواني فِ السبوع
وجات تجامل بالهنا
وتشوف علامة وميت دليل
أزاي قدرت بمفردك
تملى البُوغاز السرمدي
وتصب عشقك فِ الماجور المتسع
وبصلب شوقك تنتهك
كل المحارم بالحلال
فتنقطك حبةَّ دعا
كام كاس معتق م العسل
وبلحم طيرها يقْوّتك
يا كسفتك ..
بعد اما بان للفجر كام نقطة ندى
ضيعت ليه المحرمة