مبدعو مصر
الشعب قال
********
علمنى طين الوطن
كيف العزيمة تمد
راسى وفاسى والشقا
متعودين ع الجد
واما دموع الكرامة
سالت على خدودى
فردت عودى
وطفيت الوجع بالكد
الود شــد الوجع
واشتد حيل أيوب
والحب سهمة ارتفع
والرب رب قلوب
باب الغروب اتقفل
بـ الضبة والمفتاح
رفرف صباح الهنا
واتنفس المولــود
**************
الحلم مش ممكن يقف
والظلم مش ممكن يعود
وبرغم إن الثورة
قامت بـ الصدف
لقيت جنود
مولود يا بكره من جديد
والعيد هيطلع من عينيك
يضحك لنا
يا حلمنا الطارح امل
بعد السراب
دم الشباب هوّه إللى كفن همنا
ياعمنا الحاضر
حاضرنا بين إيديك
سايق عليك المجد
تنصب فرحنا
الفجر داوىّ جرحنا
واللى انحنى خضر نهار
من دار لدار
هنسد جحرالقهر .. ونهد السدود
إللى اتبنت .. واتحصنت
ضد الإرادة والحياة
*****************
من أجل أن يبقى الـزعيم
هوّ الـزعيم .. !
هوّ الـقديم .. هوّ الجـديد ..
فى كل حين ٍيستبد .. لنستفيد
هوّ الوحيد .. وكـُلنا نرجوا رضاة
***************
الحلم خضـّر
طرح مش ممكن يهل
الكل فاتح كف بكره للأمل
كل الجمل ..
على وش كرتون الميدان
كانت بارود ..
كل البنود
كانت غريزة للخلاص
كل الردود كانت رصاص
نشن على الإخلاص ودوس
حتى يصابوا بالشلل
****************
خـَطـْبٌ جَلـَلْ
حدثٌ ..
يفوقُ المُحْتـَمَلْ .. والاحتمالْ
الشعبُ قالْ
فأ قالْ كلَّ العابثينَ بأمره ِ
ولأمرة ِ.. الرأس أذعَنَ فاستقالْ
*************************
مين إللى قال .. إن الوطن
يسبح فى تيار الهموم
مين إللى قال .. إن المحن
تركب علينا كل يوم
هنعوم لإمتى فـ بحر إمتى
وإمتى .. ملت م السؤال
يا أيها الشعبُ الذى
عصفـَتْ بهِ ريحُ الضلال
وتساقطـَتْ أحلامُة ُ
بين التردَّى والمُحَال
الآنَ قلْ .. الآن بُحْ
الآنَ يشفِيك الطـُموح
ويحتويكَ الاعتدالْ
شتـَانَ طعمُ الفرق ِ فيك
مابين رفض ٍ وامتثال
لا تعتكفْ .
واقذف بصوتـِكَ
فا لصدىّ لنْ يْرتـَجفْ
اهتف كما تهوىّ ..
ولا تخشَ العقاب
وتسلق الإصرارَ ..
وافترشْ السحابْ
وافتـــــكْ بخوفِك
واقتـَفِى ..
أثر الشبابِ المؤتـَلِف
****************
السكة بانت
والأمل صاب الهدف
الصبح شقشق
والنهار طالع جميل
شمس الأصيل
اتبسمت للأهرامات
والصبر بات
يرقى الوشوش القطن
والدم الرطب
غنىّ القصب
والقمح بيولع شموعك
رقصت ربوعك
والميدان كان الربابة
كان النايات
إللى بتعزف للغلابة
مغرم صبابا
وعشق واصل منتهاك
من قلبِ ذاك القلبَ
دقاتٌ عـَلَتْ
وتـَغـَلـْلـَتْ فى الصمتِ
اصواتُ النضالْ
النبضُ فى الأسماءِ
فى الأشياءِ فى الأرجاءِ
أغلالٌ تثور
والنورُ يرتشفُ الرحيقَ
من الشهيق ِ من الزفِير
وحناجرُالتعبير ِ تزأر
من يمين ٍ أوشمال
اليوم نصرٌ شاملٌ
لا قيدَ بعدَ الأمس ِ
لا يأسَ بعدَ الأمس ِيـَـعدُوا
فى النفوس ِ مُهَرْولا ً
الحقُّ أمسى سائلا ً.. ومُحَذرا
كل الذين تجمهروا وتظاهروا
وحاصَرُوا فيـنا السؤال
ألا يكون َ الإرتحال
من الخيال ِ إللى الخيال
****************
يا أحلا موال ابـتدى
عللى الندا وانده يانيل
عمرإللى يلمح طلعتك
مايكون أنانى
عمر إللى يشرب ميتك
مايعــيش ذليل
ابنك يانيل
إللى قطف منك سمارة
الحب داره
والعواطف سلسبيل
الحلم مش ممكن يقف
واحنا السوافى
والظلم مش ممكن يعود
وانت الدليل .. يانــــــــيل
*****************
محطة مصر
*********
خلف الأسوار.
أسـرار ..
إزاى .. فسر.
قصر فى الدور
مكسور مهموم مظلوم محروم
وغيوم الروح بتندى مرار
بـــطـّل أعزار ..
الشاى على مين
هنحللى بإ يـــه
والسكر خايف م التموين
قصدى العفاريت
هات الكبريت . انفخ فى النار
بنفكر دايمـًا فى التنكيت
وياريت بنفوق
القوت مسروق .
والعيشة مرار
وليلاتى ننام جوة الأ وهام
وندوق أيام طعمها صبار
مشوار
من غير ما نحس يفوت
ونعيش ونموت غليان وبخار
اختار موضوع
ماتقولش الجوع
ولا تفتح ويا اليأس حوار
احرار بصحيح
ما تقولش هزار
ويامحلا الحضرة ودق الـزار
الفار والقط
وحا جات بتنط فى وشك خوف
تخبط فى الخوف
اعمل معروف وكفاية مرار
نار الأسعار خلتها سواد
الناقص زاد . والزايــد قــل
والخـل بيغرق فى الفوازير
البير مليان
وبقالنا زمان
رافضين الصلح مع الحرمان
ادمان الجهل
فى عقلك باش
متحبكهاش .. وبلاش توهان
اديها لبان يمكن تنفك
والشك النحس يروح مايجيش
ماتفهمنيش انك مرتاح
الماضى جراح ونواح وعزاب
والحاضرقبل ما يبدأ شاب
وغراب البين هيداوى الداء
والعلة هتكبر فى الأمعاء
وهنرجع للى ما يتسموش
قراقوش .. مش ناوى يجيبها البر
والشر يوماتى يطفى النور
الحـُر بيكوى الآه بالآه
وليلاتى يشم الهم بخور
سندال وساطور وخــذوق وخابور
وقع المحظور ع السلم مات
صدقت خلاص . ان احنا آفــات
ماتسيبك حبة من الخرافات
وكفاية نقار
وتعالى نجيب ترمس وفشار
خلص المشوار
نزلوا الأتنن فى محطة مصر
*********************
عابر سبيل
**********
يا للى مش محتاجة منى ..
إلا إنى ..
افتح الأوراق
واجاوب
ع السؤال المستحيل
طب قولى لى ..
الحل إيــه
فى إللى مش لا قى الدليل
كل شيئ جوايـَّة تاية
والسبيل عابر سبيل
كل مادا تسيل علىَّ
حيرة مغلية ف حنينى
حتى دينى بيتهمنى
إنى ناكر للجميل
يا ما سبت النيل يعانى
م المنافق والآنانى
والمداين والموانى
صبرها ما لهوش مثيل
طب قولى لى ازاى اصونك
وامسح الد معة فى عيونك
وابقىِ جاحد او بخيل
مستحيل انك تلومى
ع اللى جوة اللوم عليل
جيل فى عز الليل بيحلم
والأمل جواة عليل
امتى تملاه الآمانى
ويطوى بحر المستحيل
امتى هتعود الأغانى
تونس الليل الطويل
امتى هيكحل عيون العمر
بالفجر الجميل
مصر ترخص لك حياتنا
ونفتديكى جيل وجيل
طول مافية فى عروقنا دم
وطول ما فية
فى الأرض نييل
أى شيئ فى الدنيا يحصل
مصر تفضل هىّ .. هىّ
إللى فيها الشمس طالعة
والإيدين سمرة وعفية
واللى فيها الضحكة حلوة
لـَـك لكل الناس وليــــَّه