اول حديت المحبات
على طه احكي واصلي
ف ملامحه لمّا السماح بات
حُسن المعامله وصل لي
————–
ربه ف نهار ومسا معين
والنصح ف الحرف لاقله
ما تصلوا بينا يا سامعين
ع اللي قمرنا اتفلقله
______
مش كل مرسل ليه انصار
ف الدعوه بنفوس حليمه
ولا كل راضع لبن صار
ك اللي رضع من حليمه
______
وجروحي طابوا ب بلاسمه
بعد اما ف القلب صلوا
ما ابديش ولا انهي بلا اسمه
ع الهادي يا اخواننا صلّوا
———-
لابليس من احمد خطر حام
كام قلب باعه وشريفه
دا نبينا لمّا خَطَى ارحام
جانا من سلاله شريفه
——–
ياللي انتي سهمك قنص روح
كم عِمه جُوْ املبسينك
لا بنينا مره ف قنا صروح
ولا شفنا مَية بيسينك
————-
وَلّوا اللي كان ليهم جدور
وكبير ما كان يتني قُوله
وأهو لمّا سِبنا الهمج دور
كبر اللي جانا نَقوله
_______
دنيا ما خلت لينا اسعار
جات ف الأصايل تفاصل
واتباعوا فيها لناس عار
مالهمشي ف الشم واصل
____
بلا تبكي ياخي بلا تنوح
واشرم بعملك وسافر
لمّا الدنيه بلت نوح
طلع اللي من صلبه كافر
——-
لمّا زمان العنوق دار
جا التبر ف البركه راسي
ما هي دنيا عوره وليها اقدار
عطت الوطايا كراسي
—————
ويا دنيا ليه اتلطعنا
على حيطه فيها شروخك
لا صابتكي م القتل طعنه
ولا حتى ماتوا فروخك
———-
دنيا وماشيه ورا اقدار
عن لَهْوّنا دا امتى ح انهى
يوم ع اللي غفلوا الورق دار
عرفوش يحلوا امتحانها
————–
دنيا كما نار ف زيتنا
ولهبها عُمره ما وطّى
دي غروره يوم نرفزتنا
عملت قفانا منطه
—————
دنيا ويديها جنوا احباب
وانا من قليبي نافيها
على كد عمره جا نوح باب
وطلع من التاني فيها
————-
بانت جرودهم ورا انساب
واتعينوا ف الحكومه
وما دام يا خلي الورن ساب
لم عاد لتمساحها قُومه
———-
نوح اللي عمّر مشالهاش
وغروره دي لسه فينا
لقيت قليبه ما شالهاش
مسكت ف ديل السفينه
___________
دنيا وواخده الحَوَش باط
وعلينا ليها شرع جايز
ما تاريها شبعت ياخي شباط
ف المجروحين والعجايز
———
فرعون مشى وسابنا موسى
م الدنيا كله مسافر
ولو تسوى دي جناح ناموسه
لم كان شرب منها كافر
———–
دنيا وواخده الناسك لاب*
وموطيه للفجاره
ياما فيها ياخي ناس كلاب
جاز رجمهم بالحجاره
——–
ع النخوه قدّم ع اوديك
ليها بحر مين فينا عامَه
دا اللي بمراكبه عاود ديك
مش ك اللي عاود نعامه
————–
دي لحوم رخيصه ودي بمال
والصيد ح ييجي بدسيسه
ومع الغوايه ما ديب مال
الا ب شرود الفريسه
———–
ف غيط الغروره سيب احجار
واعملها حد وفواصل
ياما شيخ وماسك سِبح جار
وف وِرْده لساه يواصل
———–
دنيا لحروبها ما حاسمين
م الذل رافعينش هامه
والندل فيها محا اسمين
العزه ويّا الشهامه
—————
سيبها الغروره ما تلهاش
دا الكل ف اخرتها زايل
مين ياخي قولي ماتلهاش
ساوت العفي بالهزايل
————-
دنيا امتحانها حَوا لجان
ولا حد ع النعمه شاكر
وإن حل انس وحاول جان
ما ها ينجح الا المذاكر
—————-
ريتهم عربنا مِساندين
باعتين اعانه تشبّع
وقالولنا احنا مِسا ندين
والصبح لازم نطبّع
———-
من حبر قلمي الورق زام
كتب ف امورك عجوبه
السبع ماشي ورا اقزام
والقزم فوق الركوبه
————-
عطشان ونفسي ما حاملاش
يا ام الملابس شفايف
لِيا قُله فاضيه وما حاملاش
غير من بحور الشفايف
————
شايف رموشها جاري احطاب
ورمتها ف القلب قادت
ميتى بعينيها جريح طاب
ولا اطبه ف علله فادت
——–
حلفت بناري ع نبليك
ف هواك عشقت الكتابه
وآدي عودي طارح عنب ليك
اقطف ودوقلك هبابه
——————
عشقي قوليلي اتنسى وين
دا انا قلبي ع الطرْق ناوي
ويا بخت كل النساوين
لو تهوى واحد قناوي
…..
#محمد البرزي