ويا روعة المسك لما يفوح من عرقه.. للشاعر: محمد بهجات الخطيب

أنا بامدح اللى قلع الكفر من عرقه
جانا بدين سمح عتق العبد من عرقه
شرف زمن فيه عانا الكل من عرقه
نبى حرم الظلم وبحبل المهيمن مسك
كمل طريقه ولا خافش وحود مسك
وجهه كما البدر لا استعمل كريم ولا مسك
ويا روعة المسك لما يفوح من عرقه
مين زى سيدنا النبى بيه الإله أسرى
مين زيه فى المرحمة ومعاملة الأسرى
مين غيره يوم مولده نار المجوس انطفت
مكة سماها صفت واتزال إيوان كسرى
ما هيش عفيفة دنية النفس سفاحة
توعد بجنة وترمى فى نار لفاحة
فيا رب آدم سامحته يوم ما كلها زمان
اغفر لعثمان واكل ألف تفاحة
نشكى ونبكى تقول الدنيا حراقة
لو كان بدينا لنخرم فى السما طاقة
اكبر مافينا فجر واصغر مافيا غبى
وفكل ساعة نبى نقتل ١٠٠٠ ناقة
على شط بحر الوطن هاطلع دقيقة حداد
هابقيها مالكهربا وهكسر العداد
هاتغدا هم وحزن واتعشا صبر وجلد
واشرب تاريخ البلد وأفتى فى الأمجاد
احنا العبيد الخدم لا جميلة ولا شكره
حابسين علينا الهوا بالقفل والأكره
يا بياعين الأمل السعد فين والهنا
شوف لينا عاد كام سنة مستنيين بكره
مالك بتنضح وجع عايز تموت متموت
هملها للى افترى وابو شومه وابو نبوت
وانصح لنفسك دى ذنوبك بعد الحصى
ماتقولشى يونس عصى وانت فى بطن الحوت
فنجان يادوب مالفرح ومن الهموم جانا..زير
يوم قالوا إنك ملك ومن السما جا..نذير
طب فين يا سيدنا الولى قمح الغيطان والسبل
همك تقيل كيف جبل ماتدهوش جنازير
أنا من مرار البشر شارب ٢٠٠ جرة
وأهاتى لا بتنكتب ولا حتى تتقرا
فين الحنان يا بشر دا انا كتفى شايل جبل
فى الجوف جروح بالهبل غير اللى من برا
وبامنتج الفن وبهر الكل منتاجى
لا سالْت ولا قلت مين ياجى ومنتاجى
أنا حاتم الحرف لو جاعت قوافى الناس
والروعة فى الماس مش مالماس من تاجى
كل ماله الفضا بيضيق ويسود
والطرح فوق الشجر تلتينه بيدود
حول مالى فيكى اتكشف والمستخى اتعرف
بجنيه يا ناس الشرف فيه حد حي زود
لو كان طريقك ما بين الخلق مش سالك
حتلاقى قلبك من جوا ضلام حالك
وبدال ما ترمى على كل البشر طوبك
صلح عيوبك وسيب الملك للمالك
جربت فيكى جميع الطب ولا طبش
يالله ميزانك ركن فى الحق ولا طبش
أنا زى موسى بلا ذنب اترمى فيمك
غرقان فى همك لا عارف اعوم ولا اطبش
أبو قلب عمران كله يقين مايشكش
واللى بنى بسحت حيته يميل مايشكش
خليك مع الله وابعد ماللى يغيب وينم
العقرب ابو سم يمشى عليك مايشكش
فيه ناس تحبك قوى وتريدلك الفرحة
وناس تريد تردك وتلبسك طرحة
وناس كتير تخدعك فيها بتاخد قلم
وناس تجيب الألم وتسبب القرحة
مش لاقى سكة أمل معدولة ولا ناحية
العتمة زادت قوى ولا فيش عباد صاحية
ايه خدنا منها يا جدع غير انتباه وصفا
فيا مضروبين عالقفا قولو وراى تحيا
مالهجر تعبان سنى بان فقسوني
تاهو الأطبة وجابو جهاز فقسوني
قالوا دا تعبان قلبه ليه فقسوني
بقى كله محتار فيه اللى مشى وفى البيت
وتوصلوا لحل قالو المشكلة فى البيت
لما طوفت بالعشق وذرانى الهوى فى البيت
مش بس فى البيت كل الناس فقسوني