لونه سماره القرنفل يسكن غيطان الفل وهيبقي سيد الكل وأنت لسرايته غفير.. للشاعر: هاني صابر

ومادمت هاني في صبرك ليه وافقت تبوح؟؟!!
قلت القليب م الوجع بيفرفط كطير مدبوح
عايشين في توهة بترمي الكل في مهالك
وشايفني هالك وهربان من سفينة نوح

من فن المتلوت

سبح نبينا جوه الغار
وبنوره رحل الشرك وغار
لو كنت على دينك بتغار
أمدح نبينا وصلي عليه

ساب مكة شرفها مدينة
وقلوبنا بالحب مدينة
لو لسه باقي على دينه
أمدح نبينا وصلي عليه

أحلى الكلام كان بيعيده
والفتح ده كان يوم عيده
يوعدنا نشرب من إيده
أمدح نبينا وصلي عليه

مين اللي قال العمل بحلاله ميعديش
وفلوكة وسط المحيط تاهت مهتعديش
أوعاك في حق الجار لو حتى أجنبي
ولولا شفاعة النبي للجنة…. منعديش

قلت لها قلبي يريدك قالت بحب منير
قلت لها أسمر قوي قالت كمان بتغيير
لونه سماره القرنفل يسكن غيطان الفل
وهيبقي سيد الكل وأنت لسرايته غفير

الزن ع الودن أقوى من عمل وحجاب
تفتن وتخرب بيوت وفاكره دينها حجاب
واخده النميمة تجارة تبيع هنا وهناك
وان فتحت الشباك لازم تلبسك يا حجاب

سبعاوي
يللي نويت ع السفر خلي القلب سبعاوي
مكتوب عليك الشقا طول الايام سبعاوي
ياما عمم وعقول تاهوا في بحر سبعاوي
زينة الرجال السكوت أصل الكلام مقامات
فيه كلام يعيش للأبد وفيه كلام مقا مات
من ميتي أهل السو أتقام لهم مقامات
واللي نسي المقامات كيف هيغني سبعاوي

العمر عدي ودارسين
وأهو خيبتنا الدراسة
لو كنا للقمح دارسين
كات شبعتنا الدراسة

القلب م الفكر ورمان
ولا طب داري جوا بي
وتقولي خريجة أورمان
ولا عارفة تقري جوابي

طول عمري ذاكر في محراب
ولا مرة فني لهاني
وسهامي مليانة بحراب
واجب تحية لهاني

قولي تتوه السفن فيه
تطلبي في الحق هاجي
نقي كلامك وصفيه
وأحذر تعادي سوهاجي

موجوع وعنيك ف ضحّاك
ومساك بقي زي ضُحاك
وين الوش ال ضحّاك
يا خسارة يا زينة الناس

وبيعملوا حفلة لروبي
فصلت لباسين من روبي
والطينة شبعت من روبي
والفقر ده ملهوش علاج

ده المعنى للي فهم بال
وفؤادهُ يشبه قاعوده
فيه قول بيجرح كم نبال
وجمل بيرفص قاعوده

قضيت حياتك بالأشعار
ماتقولي إيه إللي نابك
ما تفوق لنفسك بلاش عار
ورينا قيمة لجنابك

ويابت عايشين على اللفت
وتقولي ابوكي عُماني
شكلي علي الفقر ولفت
وألا جمالك عماني

عكس كلمة موت /حياة
بس فين هي يا أبله
واللي شبعان فيك أهه
عاش منافق والا أبله

من فن المتلوت
ارتجال ..على خانة
(بكفاية هجر. قولي سماح)

لو ع العتاب ودّنا واجب
ومابينا في الحب مواجب
وبحق من شرع الواجب
بكفاية هجر وقولي سماح

وفضلت واقف في شباك
العين بتغلي….. وشباك
يللي رمتني في شباك
بكفاية هجر وقولي سماح

وناديت عليها يا عمينا
م الدمع ناقص تعمينا
سيبانا بس احنا لمينا
بكفاية هجر وقولي سماح

وفي ترعة الدنيا سبحّنا
والبخت عدي وسبحنا
ودعينا ربنا سبحنا
بكفاية هجر وقولي سماح

وكل ده علشان ح بيت
تهجر فؤادي تسيب ال بيت
لو هتناديني قوام ل بيت
بكفاية هجر وقولي سماح

يا خلي مش شايف عدلك
والظلم ليه أصبح عدلك
واللي عملته من عدلك
بكفاية هجر وقولي سماح

مش كنا قلنا وكفينا
بزيادة هجر وكفينا
والا وحشك كفينا
بزيادة هجر وقولي سماح

ملهاش أمان دنيتك !!!
ارتجال..

ملهاش أمان دنيتك خاف منها على نفسك
فرقت قلبك عشم طب سيبت ايه لنفسك
وعملت خدك مداس وعلى البيبان حجيت
وخرب لك البيت اللي أمنته على نفسك

ملهاش أمان دنيتك خاف منها علي حالك
بتهز لك هزتين وشيطانها أوحي لك
هتعيش كفيف البصيرة والفؤاد محتار
وتحس بالعار ….لو عاينت أوحالك

ملهاش أمان دنيتك خاف منها متولي
ترميك في سكة هوي هتضل 100ولي
والعشق هدّ البدن يصرخ أنا أستسلمت
والقلب قال سلمّت ع القبلة متولي

من فن المتلوت
علي خانة
(لو شاطر قولي كلامي علي مين )

ستّراه جلابية وفراّدي
مقطوع من شجرة وفرادي
وكلامي مباشر فرادي

ألحانه نشاز بره النوتة
مصاريفه كلها ع النوتة
وحداه ولدين وبنوتة
لو شاطر قولي

وفي بيته فاتح كرخانة
في الفرح بيلعب ع الخانة
ولقوه مقتول في السلخانة
لو شاطر قولي

كل الخلايق عارفينو
في الهلس دايما شايفينو
وأرخص من العيش الفينو
لو شاطر قولي

كلامي علي حد بعينه
كل اللي حواليه بايعنوا
علي سمعته الله يعينه
لو شاطر قولي كلامي علي مين