
أنا بالحزن متلصم.. شعر باللهجة المصرية للشاعر حسن الجعفري
أنا بالحزن متلصم
شروخى قد خرم الحيط
مليش معنى ومش هبنى فى حضنك بيت
وأنا فى الغربه مملكشى إنى أكون شاعر
وأنا فى العمر بسرق ضحكك الساخر
مخيف العمر يسيبك فى الزحام وحدك
غريب الليل يحنلك ويمشيلك على مهلك
عجيب الحزن يندهلك كأنه حد من أهلك
حرام نبكى على جروحنا
حرام القلب يتألم مابين كفى وبين حضنى
نزولك جوه جوف البير سبب غامض
وقوفك بين سؤال النفس أمر عجيب
قميصك آخر الرحله هيثبتلك براءة الديب
دموعك بين محبينك سنين الحزن من يعقوب
صلاتك جوه محرابك هتشفعلك ولو مغلوب
سنين العمر هتعدى ومش هتغير المكتوب
الكدب زى القمر مستنى نور الغير
والشمس بين الشجر تحمل غناة الطير
يامصرى يامننا ياكل عابر سير
الصرخه من حقى وأنا دمع كل أسير
نور الصباح أصفر وأنا لونى لون القمح
لون العيون أسمر لم الى بات فى الجرح
من غير ماأكون عالم ياحسرة التفسير
من غير ماكون عايش ياحسرة الميت
من غير ما أكون شايف ياوقعة الإنسان
من غير طنين الليل ياوعدى ع الغلبان
كفوفى م الحنين شاقه وخدى م الدموع صدى
بقدملك حصاد العمر تعاوديلى الدهب فضه
بدون داعى صحيح الليل بيعرف كل أوجاعى
قلبى فدا الأوطان وأنا عندى مين يحمله
ضهرى خطا السلطان والفكر مين يشغله
أنا كتفى ثابت هنا من قبل خلق الكون
من قبل هذا اللقا ياضحكة المجنون
كان الولد شاعر كان الحنين أخضر
فى مثل هذا الحزن مليون سنه وأكتر
من قبل آدم كان الخلاف ودى
من قبل بدء الكون أنا كنت مش فاكر
كل الجموع ساكته والساعه ماشيه تعد
أقدر أبيع عينى لكن بشوف بالعند
من قبل موسي أنا كنت بكتب ع الحجر
من قبل نوح أنا كنت مستنى المطر
من قبل ما الإنسان يضيع أنا كنت حاسس بالخطر
شئ مختصر انك تبيع حريتك
شئ مغتزل إنك تفارق ضحكتك
شئ غريب انك تغير موقفك حسب الظروف
دموعك بين محبينك سنين الحزن من يعقوب
بين الأمل والانخراط بين الندم والانهيار
بين كل شئ وانعدام الإختيار
ياقلة الصبر راح الصبر أجيبه منين
أنا الإنسان بعيش ونسان بأشيائي
أنا النص الى مستهلك حروف الجر
أنا الحزن الى هتسبنى وتكتبنى فى آخر سطر
حبيبتى لسه فيه رحلة سفر
لسه فيه مليون عتاب بعد السهر
كحلى الليل الحزين واغزليه بين الضفاير والقمر
اقرأ المزيد:
