أنا نفسي أزور الحرم وأفضل هناك داير
وأغسل ذنوب الهوي القي الضمير ناير
وصاني أبويا التقي يا وليدي ده مطلبي
دندن ف حب النبي راح ياجى لك زاير
……….
قاسية علينا البلد و بمشط فلتنا
عاوجه معانا اللسان واهو بان ف اللتنه
مين اللى فيها سوى كل اللى فيها غدر
وربطنا فيها القدر وياريته فلتنا
……..
إحنا اللى صابنا المرض ماضعيفة مناعتنا
و لا شفنا ساعة هَنا م الفرحة مناعتنا
والحزن فيها انتشر لملم عجوزها وولد
يوم مٌتنا فيها البلد ب النعي ماناعتنا
دنيا ردية قوي تعزق ف أرض البور
البطل ف أخر زمن ع الحق عما يثور
يأجوج زمانه ظهر ما تقولش إيه العمل
والشرق م المحتمل يطلعش منه النور
……..
ويادنيا غبشه قوي بتغطى ليه ع الضي
دا الظلم نابه اتبري ينهش ف لحم الني
والرمة فاحت قوي ولا طلنا غير العفن
عارف اللى مات واندفن افضل كتير م الحى
……….
إن نوّح الطير نوحه من آنين نبري
و طبيبى لما تعب كان من دواه جبري
أنا عذب مي الزمن ولامره نبعى خلف
الصبر يوم ما استلف خد حته من صبري
……….
احنا فقاري البلد ياما شحتنا القوت
نتمني ساعة هنا قبل الزمان مايفوت
عرقوب زمانا اتلوي و الحالة صبحت عدم
ليه الأصيل اتردم و تعلى ف الهلفوت
أنا خيط ضلام ف السما يبكي عليا الطير
انا صبري عاش مظلمه ساكن ف حزنه أسير
انا كهف لما اتهجر ليه بيت ف جوفه الخوف
و أنا قلب مخطوف لكن بختلف ع الغير
………
أنا بين آهات البشر جوه الحشا جرحى
أنا حزن طال له زمن مات اندفن فرحى
أنا حيط ياناس فى الهوا مبني ومالو أساس
أنا قصة بين الناس يصعب يطول شرحى
دنيا و نابها اتبري منها البشر فالين
فيها ناس تقيلة وناس ف وزنها فلين
و ناس غبية قوي سيطر عليها الجهل
بتسّيب السهل..وتغرز رجلها ف اللين
……….
لو شد كعبه البوص مايناطح الخرزان
والهيش لو يوم عفى صعب تساويه بالزان
وياما أسد بنياب ع الأرض نام وانطرح
لو عشت مليون فرح مايساوى يوم أحزان
……….
لو كله حس بعنا فيش زيه عنيه
شايل هموم البشر ولا شالوا عن نيه
ويا دنيا مالك كده حالك صبح مقلوب
ربك دا رب قلوب .. والرك ع النيه
……….
الدنيا تغدر قوى ع الكل مشى كيلها
هشكى لإله البشر وحلفت ماشاكلها
نزرعها موز وعنب ولاحد منها جنى
ولا شفنا ساعة هنا من كتر مشاكلها
طوفان وسيفه اتغرز ف الخصم كذا غزه
ودا سيف جعان ياجدع م الدم يتعزى
هدموا بروج الغجر واهو سدوا لينا الدين
دا لحد يوم الدين نهتف نقول غزه .
عبيد أبو الري