غداره دنيا الشوم ورّتنا ياما عذاب للشاعر: عبد الله ابو غديه

عاشق جمال النبى قلبى ف حُبه أسير
جانا هدايه ونور على سُنته ب أسير
قلبى ف مدحه انجلا ولا كرب شافته العين
دا بالصلاه ع الزين يتحل كل عسير
……….
عِشق النبى مطلبى والقلب بيه صدّاح
له وجه فاق القمر ساعة الضلام وضّاح
لو صابنى يوم التعب هو الطبيب م الآه
وعشان ملكنى هواه القلب صار مداح .
………..
كرباج ابوكى العفى نازل ف ضهرانى
أصرخ اقول الأه ألاقيكى نهرانى
للهلف فارشه حرير وبتبنى ليه صروح
وانا فيكى حافى الروح وتملى قهرانى
…………
صابرين عليهم زمن ساكتين ولا بنعيب
وحِملنا ياما أذى لاجل القلوب ماتطيب
كل الجروح تترفى لشفاها تلقى أمل
وجرح القرايب دَمَل بيعَيي كل طبيب
……….
يارب مالى سواك غير بابك ماليّ مقام
جيتك و شايل على كتفى بقايا حطام
دانا عبدك اللى انحنى وانت ياربي رحيم
ألطف ب حٌر كريم جارت عليه لايام
……….
اقلام كتير اتبرت في وصف سيرتهم
اجوع وانام في الطل ولا اخطي عتبتهم
طول عمري صابر انا وكتافي شيّاله
تكويني قيالة ولا ضل سجرتهم ..
………….
غداره دنيا الشوم ورّتنا ياما عذاب
ب سِنه ضحكت لنا وعضانا بألفين ناب
زرعنا فيها العُمر ماحصدنا غير العنا
رمحنا خلف المُنىَ طِلعت امانى سراب .
…….
دايره سواقى الظلم علينا عما تدوس
والحق فيها اتعصر مابين حديد وتروس
الشر زرعة نار وسطينا عالى الشان
والخير سجر عطشان ف ارض الجفا مغروس .
……….
انا اللى زارع الفرح وسقيتوا من دمعاى
وانا اللى خيرى َسرَح ولا كَلْ مره سعاى
ساعدت زين وشين ماطلبت أبداً تمن
ولَمَا جار علي الزمن ملقتش حد معاى .
…………
غَسَل إيديه الزمن وساب قلبنا ملهوف
نِزرع سعاده وهنا نحصد وجع بألوف
ماشيين وضل الشقا سابق خُطانا صفوف
هربنا م اللى باع لِبسنا ف اللى خان
ركبنا قطر أمان خدنا لمحطة خوف .
………….
عبد الله ابو غديه