ياللي انت بالخير ما عامْلوك اهجر طريقهم دا واعر.. للشاعر/ سامي ابو الفتوح

والقولة تحلاشي إلاه
محمد يا خير البرية
ف الشدة لو تذكر الله
راح تبري جرحك برية

سبحانه ربك مانحني
الصبر من عندو نعمة
ولغيرو ربك ما نحني
لو حتى ف الدنيا نعمَى

ياللي مع الموجة بلباط
وفاكرها فن ومهارة
يوم تاخد الندل بالباط
واجبة عليك الطهارة

القول يا باشا ما رزّيع
ياما هان كبارة و دانها
تبقاشي كيف المرا تذيع
كل اللي ياجي ف ودانها

ف الحق عمره ما خاب زين
لو حتى جا شطان و وَشّه
مَن أهله ف البُطل خابزين
الناس هتاكل في وِشّه

ياللي انت بالخير ما عامْلوك
اهجر طريقهم دا واعر
ملهومشي مشية مع ملوك
ليهم ف مشي الدواعر

ميتا الكباير بلشناب
ولا حتى عِمّة وعباية
كشِّر بعينك بلاش ناب
ترهِب قليل الرباية

توب الفضيلة يا لابس
الخبث من تحته باين
لا الزرعة تطلع ف يابس
ولا صدقة تشفع لخاين
…
توب الفضيلة ولابسين
والمكر فيكم دا واضح
لا الطشت يغسل ولا بسين
الفعل لو يبقى فاضح

لهيانا من كل ناحية
والنفس فيها لدودة
ف الدنيا مهما هنحيا
الجتة اخرها لدودة

ف الهم تكوي ماتكويش
بالصبر تملك دهبها
والسعي عمره ما تكويش
أرزاق وربك وهبها

وف سكة الندل مانجيش ( لم ينجو )
ولا ف طريقنا نسايره
من راحله على سكة منجيش ( لم نأتي )
غير بس تقطيع نسايره

وف سكة الندل تِهويش
دايماً ما يسلك طريقه
بيهوّش الخلق تَهويش
ف الخبث ليه مية طريقة

للحر ينسوا مواقف
لو حتى قايدة بُدوره
والندل لو كان ما واقف
دايما يشيدوا بدوره

ازرع طريقك محبات
تلقى سبيلك ما شاك لك ( من الشوك )
ولو تزرع النم حبات
م الهم تحصد مشاكلك

هامدة رياحي ما هبّاش
ونجومي ساطعين عوالي
معقولة لو كلب هبّاش
هاعويله لو يوم عوالي

من ميتا باقية مع اشخاص
ولا زول مخلد وفاضل
ف الاخرة تحيا معاش خاص
لو عشت ف الدنيا فاضل

ف السهم نرمي وما نصيب
والبخت ما بانله طالع
لو لينا ف الرزق دا نصيب
نلقاه من الصخر طالع

ياللي انت سيدك كان العدل
بالحكمة هتنجّي سيدك
لو راح تسلم على الندل
حتماً ل هتنجّس ايدك

دنيا وهالكانا كُربان
ومتوّهانا ف مَفارق
ياللي بتسعالها كَربان
مهما تعيشها مِفارق

لو تصفى مرة مع ابوك
هتعدي ف الدنيا جيلك
لو عشت طوعه ما عابوك
والرزق لو فين ياجيلك

لو همّ ف المخ برجل
او جاب يمينك شمايل
خطط بمترك و برجل
عمرك ما تمشيها مايل

نار الهفايا في جحمير
ولا تلقى ف البِر طاعتهم
راحوا الاسودة وجا حمير
ما ارتحنا من برطعتهم

صابت عقولنا جناين
من دنيا سكرها مالح
ايه بس تسوى الجناين
لو كل من فيها كالح

ما تبكي ع الدنيا غير روح
عاشت ف خيرها وف راقها
واللي يقضّيها مجروح
يندمش يوم من فراقها
……….