أخبار الادب

من الأول .. قصيدة بالعامية المصرية للشاعر: محمود تقي

لو الأيام تعود من تاني والله
ماكنت هخاف من الغوله ولا العفاريت
ولا هزعل من امي في يوم
اذا حبستني جوه البيت
مكنتش هسرق الورد اللي في الشارع
ولا الأستاذ هيزعل مني في التسميع
هزاكر وابقى طفل مطيع
يحب كتابه زي الحوش
مكنتش يوم هقول لأ
على الأكل اللي مبحبوش
وهصحى الصبح بدري بكيفي مش تكدير
هتظهر بسمه على وشي لما الحاج يضربني
وهفهم انه حب كبير
هجرب كل شيء في الكون
وابطل خوف وابطل كدب
هحب الناس وانا فاهم
إن الخلق صعب تحب
تشوف نعمه في ايدين غيرها
هغير مالبداية حاجات
محال دلوقتي اغيرها
وهختار الصحاب بالعقل
عشان القلب مش بيشوف
هبان اقوى من الايام
ولا تكسرني اي ظروف
هسافر تاني من اسوان
لحد بلادك الرايقه
واغنيلك على الشط اللي بتحبيه
وهستمتع بطعم الوقت في وجودك
واحقق في اللي تتمنيه
لا هرضى غيابنا يسرق مننا التفاصيل
ولا هسمح حياتنا الحلوه تتحول
لو الأيام تعود من تاني والله
هغير كل شيء لكن
هعيد حبك من الأول

اقرأ المزيد:

كل يوم شاعر .. سكة سفر.. شعر: عيد حميدة

طار يا ( طار ): شعر.. عاشور الزعيم _ الوادي الجديد_ الداخلة

أنا بين آهات البشر جوه الحشا جرحى.. شعر بالعامية للشاعر: عبيد أبو الري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *