لا جبان ف يده بان السيف ولا سرج خال ع الحماره.. للشاعر: سامي الهواري

أول كلامي راح أنشد
لنبينا ع الخلـــق سيـــره
وف الحق ديمآ راح انشد
وف حبله ما ارخيش نسيره
والفجر كـبّــر وصاح بـيـه
وصلاتـه دي امجمـعـانا
ف الغار وبيقول صاحبيه
ماتخافش دا الله معانا
أسمع لقولي بلاش تال
دالحكمة في القول وصايا
تنبتش نخله بلا اشتال
إلا بموت الفصايا
ألواو معاني وحكايات
والعبره في الخلق ياما
واللي كلامه حكا آيات
تشهد له يوم القيامة
من كتر همي العقل ساح
والشهر عايـف سـبـوعـه
لا البرص راح يبقى تمساح
ولا كلبه تولد سبوعه
ع الوقت أصـبر يامـعـزول
الدنيا مش دوم تـــراضــي
مع زول بتعلى ومع زول
تـخــفـس با ابـوه الأراضي
ف حبال عدلها ما شابطين
واللي بيفلت تجيبه
مين اللي فيها مشى بطين
ولا خد له قرشين ف جيبه
هات غزل فيها وهات نول
لو حـتى هافت نبالك
أصبر عليها و هاتنول
اكتر من اللي ف بالك
الندل يشطح ومنفوخ
بالشر نفسه ملاها
والدنيا لما تنصب افخوخ
ع الحُر ترمي بلاها
سيبك من الكدب والزيف
باينين ولاد الأماره
لا جبان ف يده بان السيف
ولا سرج خال ع الحماره
ع الأصل دوّر يا عسّاس
م الواطي ياما خلق قاسوا
دا الرك في الأصل ع الساس
مش ع اللي بالمتر قاسوا
جور يازمان العمم جور
ما البركة ولّت وراحت
لا جاموسه ع تحن لمجور
ولا سمنه للفقري ساحت
ويابت نورك محا ليل
مافي ضلمة وقفت قـصاده
والقلب علّق محاليل
من وقـــت رمشك ماصاده
من طلّه ماشي بغير بال
وف بالي عمرك ماكنتي
غربلت قلبي بغربال
الكل طب ألا أنتي
بصرف ف مالي وبغداد
واهو كل مــايـفــر انسى
يسطلني رمشك ف بغداد
أصحى ف آخر فرنسا