من قبلي لبحرى
القطر بيرمح
ويدوس ع اللحظة الفايتة
بغباء مش عادي
والليل في القطر
بواقي نهار
ملفوفة ف شنطة
وحداني مسافر
بعنيه الدايخين
بيوزع تفاصيل أحزانه
على كل محطة
ويخبي أحلامه
ف كل عنين يقابلها
ويعيش لحظات الفقد
بصورة مخيفة
ف كل صوابع
بتشاور بوداع
من قبلي لبحرى
القطر بيدبح
جلد الأرض
من غير ما يسمي
ويسيّل ملح الحواديت
الهربانة
من الواقع
جوة الحلق
وبعثر دخانة الخانق
داخل نخاشيش الخلق
ويساوم تعاريج
النيل الدايب
جوة قصيدة أرض
ويصالح المدن المرمية
ف حضن الجبل الغربي
وبشكل نهائي
أحياناً يصدق
وبيوصل ف معاده
لكنه ف الغالب
كداب ومرائي
بيحش الأحلام
زي المنجل
ف حشيش أخضر
أخطر من أيها جلاد
من قبلي لبحري
القطر بيفرح
ببسالة
وهو بيوصل
لمحطة رمسيس
وبيركن
على أول قهوة
يقابلها ف الزحمة
ويتوه له يومين
ف شوارع مصر
على بال ما بيزهق
يكره نفسه
فيرمي عجلاته
على سكة وينعر
ويقبل من تاني
من قبلي لبحري
القطر بيجرح
قلب البنوتة
المتعلقة ف حبال العشق
تستنى حبيبها يعاود
مع كل مسافر راجع
كداب وملاوع
يا القطر الراجع
من غيره
منزوعة الرحمة
من قلبك
وانت بتبعد
ناس عن ناس
ولا عندك احساس
يا أبو قلب حديد
قال وتغني
مع كل قلوب
تدهسها بعجلاتك
وترشرش سكر
على كحك الفقرا
في الدرجة التالتة
تحايلهم بخباثة وكدب
فيغنوا معاك
بغباوة وطيبة
كحك بسكر
كحك بسكر
كحك بسكر
……….
فتحي حمد الله
Pingback: أحمد الشافعي يكتب لزوجته في عيد ميلادها..أنتِ الربيعُ إذا ما العمرُ أجدبَهُ -